A Asesoría Xurídica da Unión Intercomarcal de Comisións Obreiras (CCOO) de Santiago de Compostela acaba de gañar un xuízo no xulgado número dous da capital galega polo despedimento dunha traballadora e afiliada do sindicato. A sentenza considera nulo o despedimento e obriga a empresa, Exfoga S. L., a readmitila nas mesmas condicións laborais que tiña e a lle aboar os salarios que deixou de percibir.

Desde a Unión Comarcal de CCOO queren transmitirlle á traballadora e ao conxunto da organización a súa felicitación pola sentenza e, ao mesmo tempo, «a nosa tristura porque en tempos de democracia e liberdade teñamos que seguir denunciando os empresarios por represaliaren os seus traballadores como consecuencia de exercermos dereitos que temos recoñecidos no Estatuto dos Traballadores». Como exemplo poñen o caso desta traballadora, que foi candidata ás eleccións sindicais da súa empresa.

A organización sindical apunta que feitos coma este evidencian que «aínda temos que facer grandes esforzos para que estas situacións non se repitan», e trasladan o seu ánimo a todas as candidatas e candidatos de CCOO, «xa que temos que seguir loitando para defender os nosos dereitos como clase traballadora».

A Federación de Servizos Financeiros e Administrativos de Comisións Obreiras (Comfia-CC OO) anuncia que mañá xoves, 8 de maio, das 11 ás 12:30 horas, haberá na Coruña unha concentración de delegados do BBVA de Galicia, Asturias e Castela e León —comunidades autónomas que forman a Territorial Noroeste do banco—. Terá lugar na porta da oficina principal da entidade financeira na cidade herculina —zona do Cantón Pequeno—.

Desde Comfia-CC OO explican que o motivo da concentración é a implantación por parte do BBVA de dous proxectos —’Velázquez’ e ‘Clima’, enmarcados no Plan de Innovación e Transformación que está a realizar a entidade financeira— que están suscitando entre o persoal incerteza e desconfianza respecto de numerosos asuntos. Entre as materias que preocupan a case 4000 traballadores e traballadoras —1600 deles en Galicia— están o salario, a supresión de complementos, a falta de formación, os traslados e os cambios de posto, así como a posibilidade que se externalicen ou subcontraten servizos.

Durante a concentración, os sindicatos convocadores faranlle chegar ao responsable de recursos humanos do banco unha carta para lle transmitir a súa preocupación e a dos traballadores da entidade. Tamén reclamarán o establecemento dunha negociación que consideran «imprescindible» para que os cambios do plan de innovación poidan contar coa máxima participación e garantías para os traballadores do BBVA.

Por parte de CCOO, a negociación procurou favorecer a estabilidade do persoal funcionario interino e do persoal laboral temporal, interpretando «en sentido amplo e positivo» as disposicións normativas recollidas na reforma da Lei da Función Pública de Galicia e do IV Convenio Único para o persoal da Xunta.

O sindicato tamén procurou mellorar a promoción profesional dos funcionarios de carreira e do persoal laboral fixo, un plan de promoción profesional que, entre outras cuestións, permita para o persoal funcionario a promoción por reclasificación do posto e por consolidación do grao. Tamén buscou establecer a promoción horizontal por concurso, mellorar a promoción vertical, e prever un proceso de funcionarización para o persoal laboral. En calquera caso, CCOO pretende que a taxa de eventualidade da Xunta non volva acadar porcentaxes «inxustificadas».

Alegacións de CCOO

CCOO considera que o preacordo recolle as «alegacións fundamentais» que formulou o sindicato, agás a da opción de recolocación en praza vacante, «que a Administración non aceptou co argumento de que esixía unha modificación normativa. Seguiremos insistindo nunha interpretación positiva da normativa vixente para que esta opción voluntaria sexa factible co fin de que, na medida do posible, non haxa prexudicados innecesariamente», indican.

Igualmente, CCOO lamenta que a «irresponsabilidade sindical da CSIF», que se desmarcou do acordo «por razóns alleas ao contido», poida poñelo en perigo, «como xa pasou cando xunto coa CIG xudicializou o proceso de consolidación de emprego do ano 1998» e que «aínda mantén, a día hoxe, a 68 traballadores/as nunha inseguridade laboral inxusta, que agardamos non suceda neste caso», explican desde o sindicato.